Pages

Tuesday, June 2, 2009

වීර කතා අතර තවත් අග්‍රගණ්‍ය සිනමා පටයක් : 300 (2006)

අතීත වීර කතා නිරන්තරයෙන්ම සිනමාවට නැගෙන්නේ ඒවායේ ඇති අපූරු චමත්කාරජනක බව නිසා ය. මේවා අතර ඉතා විශිෂ්ට ගණයේ චිත්‍රපට ලෙස Gladiator, Alexander, Troy වැනි ඒවා හඳුන්වන්න පුලුවන්. මේ ගණයටම අයත් වන තවත් එක් සුවිශේෂී නිර්මාණයක් තමයි 300. මෙය මේ පුරාණ වීර කතාව හොලිවුඩ් චිත්‍රපටයකට නැගුණු මුල් අවස්ථාව නොවෙයි. ඇත්තටම එය ප්‍රථම වරට ලෝකය ඉදිරියට පැමිණියේ 1962 තිරගත වූ The 300 Spartans නම් චිත්‍රපටයෙන්. නමුත් මම කියන්නට යන 300 චිත්‍රපටය වර්ෂ 2006 දී නිෂ්පාදිත එකක්.

මෙම චිත්‍රපටය පුරාවටම ඇති අති විශිෂ්ට යුධමය දර්ශන නරඹන්නාගේ සිත තුලට ගෙන එන්නේ Lord of The Rings: Return of the King හි අවසන් යුද්ධයයි.

මීට පාදක වී ඇත්තේ ක්‍රි.පූ 480 දී ග්‍රීක ස්පාර්ටාවරුන් හා පර්සියානුවන් අතර සිදු වූ තර්මොපයිලේ යුද්ධයයි. ස්පාර්ටා යනු පුරාණ ග්‍රීසියේ එක් නගර රාජ්‍යයක්. ලෝකයේ මෙතෙක් බිහි වූ විශිෂ්ටතම රණකාමීන් සිටියා යැයි සැලකෙන්නේ මෙහි යි. නමුත් පර්සියානුවන් පෙරදිග රාජ්‍ය විශාල ගණනක් තම යටතට ගනිමින් ස්පාර්ටාවත් ආක්‍රමණය කිරීමට පැමිණෙනවා ලක්ෂයක හමුදාවකුත් රැගෙන. ඒ සෙනඟට මුහුණදීමට තරම් ස්පාර්ටාවරුන් ශක්තිමත් නෑ. ඒ අතරම ස්පාර්ටා පූජකයන් ද අනුමාන කරනවා පර්සියානුවන් සමඟ යුද්ධයට ගියහොත් ස්පාර්ටාව පරදින බව. නමුත් පර්සියානුවන්ට තම රට පාවාදී තම වැසියන් වහලුන් කිරීමට එහි රජු වන ලියොනිඩස් කැමති නැහැ. නමුත් ඔහුට පූජකයන්ට එරෙහිව යන්න බැහැ. ඒ නිසා තම හමුදාව රැගෙන සටනට යන්න ඔහුට හැකියාවක් ලැබෙන්නේ නැහැ. එබැවින් 300ක් වූ ස්පාර්ටාවේ විශිෂ්ටතම රණකාමීන් පිරිස රැගෙන ලියොනිඩස් තර්මොපයිලේ කඳු ශිඛරයට යනවා පර්සියානුවන්ගේ මඟ ඇහිරීමට.

මේ සෑම සොල්දාදුවෙකුගේ ඇඟ තුළම දුවන්නේ හර්කියුලීස් පරපුරෙන් පැවත් එන ලේ. ඔවුන් උපන්නේ යුද්ධයට; ඔවුන් මැරෙන්නේත් යුද්ධය වෙනුවෙන්. ඒ තම රට ආරක්ෂා කරගැනීමේ පරම අහිප්‍රාය වෙනුවෙන්.....

තර්මොපයිලේ පසුකර ඒමට නම් කඳු දෙකක් අතර වූ කපොල්ලක ඇති කුඩා අඩි පාරකින් පර්සියානු හමුදාව පැමිණිය යුතුයි. මේ හරහා ඔවුනට පැමිණීමට ඉඩ නොදීමට ස්පාර්ටාවරුන් අදිටන් කරගන්නවා. සැබැවින්ම එය පර්සියානුවන්ගේ මරු කපොල්ල වනවා. ඒ හරහා පැමිණීමට ගිය දහස් සංඛ්‍යාත පර්සියානුවන් එකා පිට එකා මැරී වැටෙනවා. ඒ ලොව මෙතෙක් සිදු වූ අති බිහිසුණම සංග්‍රාමයයි. දින 10ක් පුරාවට ලියොනිඩස්ගේ 300ක හමුදාව, ලක්ෂයකට වැඩි
පර්සියානු හමුදාවට අඩියක් හොල්ලන්න බැරි ලෙස රඳවා තබාගන්නවා. නමුත් මේ අතර එෆියාල්ට්ස් නම් ස්පාර්ටා හමුදාවෙන් පන්නා දැමූ විකෘති මිනිසෙක් පර්සියානු රජු වන ක්සර්ක්ස් හමුවට යනවා. ඔහු එළුවන් ගමන් ගැනීමෙන් සෑදුණු කුඩා අඩිපාරක් ක්සර්ක් පෙන්වා දෙනවා. ඒ ඔස්සේ ගමන් කිරීමෙන් ස්පාර්ටාවරුන්ට පිටිපසින් පහරදීමට පර්සියානුවන් සමත් වෙනවා. ලියොනිඩස් රජු ඇතුලු ස්පාර්ටාවරුන් 300 දෙනා වීරයන් ලෙස මිය යනවා. නමුත් අවසන් මොහොත වනතුරුත් මේ වීරයන් බේරාගැනීමට අතිරේක හමුදා එවීමට ස්පාර්ටා කවුන්සිලය සමත් වන්නේ නෑ. ලියොනිඩස්ගේ සටන නිවැරදි බව ස්පාර්ටාවේ කුහක කවුන්සිල සාමාජිකයන්ට අවබෝධ කරදීමට ඔහුගේ රැජිණ ගෝර්ගෝට හුදකලා සටනක නිරත වෙන්න සිද්ධ වෙනවා. අවසානයේ ඇය ජයගන්නවා. නමුත් ඒ වනවිට ලියොනිඩස් ඇතුලු රණකාමීන්, ස්පාර්ටා දේශය වෙනුවෙන් දිවි පුදා අවසන්.

කතාව ඔන්න ඔහොමයි. සමස්ත චිත්‍රපටයේම කැමරාකරණය මා සිත ඇද බැඳ ගැනීමට සමත් වුණා. කැමරා කෝණ විතරක් නොවෙයි, චිත්‍රපටයේ වර්ණ පවා ඉතාම සිත්ගන්නාසුලුයි. ඒ කොතෙක්ද කියනවා නම් පැය 1යි විනාඩි 56ක් පුරාවට තිරයෙන් ඇස් ඉවතට නොගෙන ඒ දෙස බලා ඉන්නට තරම් ආසාවක් ඔබට මෙය නරඹද්දී ඇති වෙනවා.

මේ අතිරමණීය පුරාණ වීර කාව්‍යය ඔබේ සිත වසඟයට ගත්තෙ නැත්තම් පුදුමයක් තමයි.

6 comments:

පොතේ ගුරා said...

ඇත්තටම නියම ෆිල්ම් එකක්..ඕකට තව් ෆිල්ම් එකක් හදල තියෙනව Meet the Spartans (2008)කියල..

චමින්ද said...

onna langadeema enawa apeema weera kathawa King dhutugamunu ,

Anonymous said...

හප්පේ... තව මොන කතාද... දෙතුන් සැරයක් බලන්ට හිතෙන චිත්තරපටියක්...!!

Chamitha said...

@පොතේ ගුරා: ඔව් ඔව්, ඔය කියන Meet the Spartans ෆිල්ම් එකත් මගේ ළඟ තියනවා. ඒ මේකටම ගහපු කොමඩියක් නේ? මම තාම හරියට බැලුවෙ නෑ. තැනින් තැන තමයි බැලුවේ. ඒත් මේ වගේ විශිෂ්ට චිත්‍රපටයක් ඒ වගේ හාස්‍යයට ලක්කරන එක ගැන මම විරුද්ධයි...

said...

මාත් බලපු සිරාම Film එකක් තමා

Anonymous said...

film 1 nam maru kiyala hondata therenawa. eth niruwath sceen tikak thiyena nisa dl karala balannath kalin del kara. aparaade

Post a Comment

මේ ලිපිය ගැන ඔබට හිතෙන්නේ මොකක්ද? ගල්, මුල්, මල් ඕන දේකට ඉඩ...
සිංහලෙන් යතුරු කරන්නට යුනිකේත එසැණින් පරිවර්තකය භාවිතා කරන්න පුළුවන්.