සෙනසුරාදාට පෙර...

දැන් වෙලාව බ්‍රහස්පතින්දා (14-05-2008) රෑ 12යි. කාලය වේගයෙන් ගතවී යන්නේ ලංකාව මෑත ඉතිහාසයේ මුහුණදුන් අභියෝගාත්මකම දින කිහිපයේ අවසානයත් සමඟයි. නමුත් තවමත් සියල්ල අවසන් නැත. ග්‍රීස් ගහේ නැග සිටින තරඟකරුවා දැන් කොඩිය මත අත තබාගෙන එය ගැලවීමට සූදානමින් සිටියි. මම මේ කියන්නේ වෙන කිසිවක් ගැන නොව වසර 26ක් මුළුල්ලේ ඇදී ගිය ශ්‍රී ලංකාවේ ත්‍රස්තවාදී යුද ගැටලුවේ අවසාන මොහොත දැන් දැන් එළඹෙමින් පවතින නිසා ය. නමුත් මේ වනවිට ශ්‍රී ලංකා ත්‍රිවිධ හමුදාවට ත්‍රස්තවාදීන් සමඟ පමණක් නොව කාලය සමඟ ද සටනක් දීමට සිදු වී තිබේ. ඒ ඇයි? මෙතෙක් කලක් ශ්‍රී ලංකාවේ අර්බුදය ගැන කට පියාගෙන සිටි බැරැක් ඔබාම ද අද මුල් වරට තම මුඛය විවෘත කළේ ය. ගැටලුව එය ද?

නැත. එය නොවේ. දැනට සති ගණනාවක් මුළුල්ලේ පැවති ඉන්දීය මහා මැතිවරණයේ ප්‍රතිඵල සෙනසුරාදා උදෑසන වන විට නිකුත් වීමට නියමිත ය. ඒ සමඟම එරට තුල දැවැන්ත සටනක් ඇරඹේ. ඒ රජයක් පිහිටුවීමට ය. ඉන්දීය මැතිවරණ ක්‍රමය තුළ තනි පක්ෂයකට රජයක් පිහිටුවීමේ හැකියාවක් නොමැති නිසා ප්‍රධාන පක්ෂයන්ට අනිවාර්යයෙන්ම කුඩා පක්ෂ බිලිබා ගත යුතුය. ඒ අතරින් ද තමිල්නාඩු ප්‍රාන්තය නියෝජනය කරන DMK හා AIDMK පක්ෂ ඉතා වැදගත් ය. ඉන්දීය පාර්ලිමේන්තුවේ ආසන 540 න් 39 කටම හිමිකම් කියන තමිල්නාඩු ප්‍රාන්තය සාමාන්‍යයෙන් සැලකෙන්නේ රජා තනන ප්‍රාන්තය ලෙසයි. මේ ප්‍රාන්තය තුල ඉන්දියාවේ ප්‍රධාන පක්ෂ 2 වන කොන්ග්‍රසයට හෝ භාරතීය ජනතා පක්ෂයට සැලකිය යුතු බලයක් හිමි නැත. ඒ නිසා 84 හැවිරිදි මුතුවේලු කරුණානිධිගේ නායකත්වයෙන් යුතු DMK හෝ ජයලලිතා ජයරාම් හෙවත් "අම්මා" ගේ නායකත්වයෙන් යුතු AIDMK යන පක්ෂ වලින් බහුතර ආසන ගණනක් හිමිකරගන්නා පක්ෂය බිලිබා ගැනීමට අනිවාර්යයෙන්ම කොන්ග්‍රසයට හා BJPයට අවශ්‍ය වේ. නමුත් මේ මැතිවරණය තුලත් කොන්ග්‍රසයට වැඩි වාසි හිමි නිසා ඔවුන්ට AIDMK පක්ෂය අවශ්‍ය කරන තත්වයක් මතු වුවහොත් අනිවාර්යයෙන්ම එය ලංකාවට හොඳ ලකුණක් නොවේ.

මන්ද ජයලලිතා මැතිවරණ කාලය තුල කී කතා ලංකාවට පැහැදිලිවම තර්ජනාත්මක ඒවා නිසා ය. වරක් ඇය කීවේ තමා දිනුවහොත් ඉන්දීය හමුදාව ලංකාවට යවා ලංකාව තුල වෙනම ඊළමක් ඇති කරන බව ය. ඉතින් එවන් පක්ෂයක් තමිල්නාඩුව තුළ බලයට පත් වුවහොත් එහි සහයෝගය ගැනීමට නම් ඉන්දීය මධ්‍යම ආණ්ඩුවට තරමක හෝ ඊට සමාන කටයුත්තක් කිරීමට ඇවැසි ය. සෝනියා ගාන්ධිගේ නායකත්වයෙන් යුතු කොන්ග්‍රස් පක්ෂයේ ආණ්ඩුවක් පවතින වකවානුවක එවැන්නක් වීමේ ඉඩකඩ ඉතා අඩු වුවත් ඉහත කරුණ නිසා ඔවුන් පත් විය හැකි මහත් අපහසුතාවයෙන් ගලවාගැනීමේ මහත් වගකීම ද පැවරී ඇත්තේ ශ්‍රී ලංකා හමුදාවන් මතම ය. ඒ සෙනසුරාදා උදෑසන වන්නට පෙර ඊළම අවසන් කර දීමෙනි. ලබාගන්නට ඊළමක් නැති තැන ඒ සඳහා කෙරෙන ඉල්ලීම ද කුණුකූඩයට යාම වැලැක්විය නොහැක.

කෙසේ හෝ වේවා පසුගිය කාලය තුල ශ්‍රී ලංකාව ගෙනගිය මහා යුද මෙහෙයුමට තිරය පිටුපස සිට (නිහඬව හිඳීමෙන්) මහත් මෙහෙයක් කළ කොන්ග්‍රස් පක්ෂය බේරාගැනීම මේ මොහොතේ ලංකාවේ යුතුකමකි. ඒ නිසා හෙට (හෝ අද) දිනය තුළ යුද පෙරමුණේ ප්‍රබල වෙනසක් සිදුවීම අත්‍යාවශ්‍ය ය. එය ඉන්දියානුවන්ට ද ශ්‍රී ලාංකිකයන් වන අපට ද එක ලෙස තීරණාත්මක ය.